बाळसई येथे शिवजन्मोत्सव सोहळ्यानिमित्त विविध कार्यक्रमांचे आयोजन
दिनेश ठमके
सुकेळी : नागोठणे जवळच असलेल्या बाळसई येथे अखंड महाराष्ट्राचे आराध्य दैवत श्री. छत्रपती शिवाजी महाराज यांची ३९५ वी जयंती बुधवार दि.१९ फेब्रुवारी २०२५ रोजी उत्साहात साजरी होणार आहे. यानिमित्ताने विविध कार्यक्रमांचे आयोजन करण्यात आले आहेत.
या कार्यक्रमांमध्ये बुधवारी सकाळी १० वाजता किल्ले रायगडहुन बाळसई येथे शिवज्योतीचे आगमन होईल. त्यानंतर ध्वजारोहण, रुद्राभिषेक झाल्यानंतर शिवप्रतिमेचे पुजन करण्यात येणार आहे. दुपारी २ ते ३ या वेळेत महिला मंडळ बाळसई यांच्यासाठी हळदी कुंकूचा कार्यक्रम पार पडेल. तसेच ४ ते ८ या वेळेत संपूर्ण बाळसई गावात भव्य मिरवणूक सोहळ्याचा कार्यक्रम पार पडल्यानंतर श्री. छत्रपती शिवाजी महाराजांची आरती होईल. शेवटी उपस्थित शिवभक्तांना स्नेहभोजन देऊन या भव्यदिव्य कार्यक्रमाची सांगता होणार आहे. हा कार्यक्रम यशस्वी करण्यासाठी शिवप्रतिष्ठान बाळसई, ग्रामस्थ मंडळ व महिला मंडळ बाळसई मेहनत घेत आहेत.
