नागोठण्यातील कनिष्ठ महाविद्यालयांचे बारावीच्या परीक्षेत यश 

नागोठणे : महाराष्ट्र राज्य माध्यमिक व उच्च माध्यमिक शिक्षण मंडळातर्फे फेब्रुवारी-मार्च २०२५ मध्ये घेण्यात आलेल्या बारावी परीक्षेचा निकाल  सोमवार दि. ०५ मे २०२५ रोजी दुपारी ऑनलाईन जाहीर करण्यात आला. यामध्ये नागोठणे येथील कोकण एज्युकेशन सोसायटीच्या कै. बापुसाहेब देशपांडे विद्या संकुलातील कै. एस.पी.जैन कनिष्ठ महाविद्यालयाचा विज्ञान,वाणिज्य व कला या तिन्ही शाखेचा १२ वीचा एकूण निकाल ९०.३९ टक्के इतका लागला आहे. यामध्ये विज्ञान शाखेचा ९६.८५ टक्के , वाणिज्य शाखेचा ९७.२२ टक्के, तर कला शाखेचा निकाल हा ६३.६३ टक्के इतका लागला आहे.

यंदा महाराष्ट्र राज्य माध्यमिक व उच्च माध्यमिक शिक्षण मंडळातर्फे फेब्रुवारी-मार्च २०२५ मध्ये घेण्यात आलेल्या बारावी परीक्षेत कोएसोच्या कै.एस.पी. जैन कनिष्ठ महाविद्यालयातील विज्ञान वाणिज्य व कला या तिन्ही शाखा मिळून एकूण ३३३ विद्यार्थी परीक्षेसाठी बसले होते यातून ३०१ विद्यार्थी हे उत्तीर्ण झाले आहेत. विज्ञान शाखेतून कु. शर्मा अनु गोपाळ ही  विद्यार्थीनी ८६ टक्के गुण मिळवुन प्रथम आली आहे. तर कु.मस्तुद हर्ष विलास ( ७९.५०%), कु.श्रीवर्धनकर सृष्टी दत्ता ( ७८.५०%) हे विद्यार्थी अनुक्रमे द्वितीय व तृतीय क्रमांकाने उत्तीर्ण झाले. वाणिज्य शाखेत कु.भालेकर मिनाक्षी लक्ष्मण हिने  ७६.३३ टक्के गुण मिळवून प्रथम पटकाविला.तर कु. मढवी वेदांती रोहीदास ( ७२.३३%), कु.जांबेकर दिव्या दिपक (७०.८३%) हे विद्यार्थी अनुक्रमे द्वितीय व तृतीय क्रमांकाने उत्तीर्ण झाले. याचबरोबर कला शाखेतून कु. नाईक राणी लक्ष्मण ही विद्यार्थिनी ६२ टक्के गुण प्राप्त करत प्रथम आली तर कु.खंडागळे मानसी विलास (६०%) व कु. भोईर प्रणाली तानाजी (५५.६७%) हे विद्यार्थी अनुक्रमे द्वितीय व तृतीय क्रमांकाने उत्तीर्ण झाले.

दरम्यान फेब्रुवारी-मार्च २०२५ मध्ये घेण्यात आलेल्या बारावीच्या बोर्ड परीक्षेत कोएसोच्या कै. एस.पी. जैन कनिष्ठ महाविद्यालयातील तिन्ही शाखेतील उत्तीर्ण झालेल्या सर्व यशस्वी विद्यार्थ्यांचे कोकण एज्युकेशन सोसायटीचे अध्यक्ष अॅड. सिध्दार्थ पाटील,स्थानिक शाळा समितीचे चेअरमन नरेंद्र जैन, प्राचार्या राधिका ठाकूर, वरिष्ठ लिपिक संतोष गोळे यांच्यासह सर्व शिक्षक शिक्षकेतर कर्मचारी या सर्वांनी भरभरून कौतुक करत पुढील वाटचालीसाठी शुभेच्छा दिल्या.