रिलायन्स कंपनीच्या नागोठण्यातील कामगारांना भरघोस पगारवाढ देणारा करार 

नागोठणे : रिलायन्स इंडस्ट्रीज लिमिटेडच्या नागोठणे मॅन्युफॅक्चरिंग डिव्हिजन मध्ये कार्यरत असलेल्या कामगारांस पुन्हा एकदा भरघोस  पगारवाढ मिळविण्यात कामगार संघटना फोरम यशस्वी झाली आहे. रिलायन्सच्या येथील कामगारांना सिटीसी प्रमाणे सरासरी १६ हजार ५०० एवढी भरघोस पगारवाढ झाली आहे. या करारामुळे वेगवेगळ्या श्रेणीतील कामगारांचे मासिक वेतन रुपये ७० हजार ते सव्वा लाख रुपयांच्या वर होणार आहेत. तर या करारामुळे थकबाकीच्या स्वरूपात कामगारांना लाखोंची लॉटरी लागली असून अडीच ते तीन लाखांच्या वरील रकमेची थकबाकी कामगारांच्या खात्यात जमा झाली आहे. या कराराची माहिती कामगार संघटना फोरमने बुधवारी (दि.४) रिलायन्सच्या निवासी संकुलातील सभागृहात पत्रकार परिषदेत दिली.

रिलायन्स कंपनीतील आत्तापर्यंतचा हा सर्वोत्तम पगार वाढीचा करार असल्याचा दावा भारतीय श्रमिक शक्ती संघ, पेट्रोलियम एम्प्लॉइज युनियन (इंटक), महाराष्ट्र समर्थ कामगार संघटना, श्रमिक सेना, पेट्रोकेमिकल एम्प्लॉईज युनियन, कोकण श्रमिक संघ, भारतीय कामगार सेना या सात कामगार संघटनांच्या फोरमने केला असून या करारामुळे कामगार वर्गात फक्त आणि फक्त “खुशी” अजिबात नाही “गम” असे वातावरण आहे. साडेपाच वर्षांसाठी असलेल्या या कराराची मुदत १ डिसेंबर, २०२३ ते ३१ मे, २०२९ राहणार आहे. या कराराच्या दरम्यान निवृत्त झालेल्या कामगारांनाही या कराराचा काही प्रमाणात फायदा होणार असल्याने त्यांच्यातही आनंदाचे वातावरण आहे.

मागील वेतनवाढ करार ३० नोव्हेंबर, २०२३ रोजी संपुष्टात आला होता. कामगार संघटना फोरमच्या वतीने चार्टड डिमांड्स कंपनीकडे सादर करून फोरमच्या वतीने मागण्यांबाबत कंपनी व्यवस्थानाकडे पाठपुरावा करून यशस्वीपणे बोलणी करण्यात आली. अखेर २१ मे, २०२५ रोजी रिलायन्स कंपनी व्यवस्थापन व कामगार संघटना फोरमच्या वतीने कंपनीचे वरिष्ठ अधिकारी व कामगार संघटना प्रतिनिधी यांनी वेतनवाढ करारावर  सह्या  करून प्रतीक्षेत असणारे कर्मचारी यांस भरीव पगारवाढ, अति उत्तम महागाई भत्ता (व्ही.डी. ए) स्कीम, बोनस, मुळ वेतनामध्ये प्रत्येक वर्षी भरीव वाढ, सर्वोत्तम वैद्यकीय सुविधा, मुलांना मोफत शिक्षण इत्यादी आर्थिक फायदे, सेवाशर्ती व सवलती कराराच्या रूपाने मिळवून दिल्या आहेत. त्यामुळे रिलायन्स कंपनी मधील कर्मचारी वर्गामध्ये आनंदाचे वातावरण आहे.

मागील ३६ वर्षांच्या कालखंडामध्ये ज्यांचे नेतृत्व व मार्गदर्शन लाभले असे लोकप्रिय कामगार नेते, महाराष्ट्र राज्याचे जेष्ठ मंत्री, श्रमिक सेनेचे संस्थापक ना. गणेश नाईक यांचा या यशामध्ये सिंहाचा वाटा आहे. त्याचप्रमाणे वेळोवेळी ज्यांचे मार्गदर्शन व सहकार्य लाभले असे रायगडचे विद्यमान खासदार सुनिल तटकरे, भारतीय कामगार सेना अध्यक्ष खासदार अरविंद सावंत, श्रमिक सेनेचे अध्यक्ष व माजी खासदार संजीव नाईक, राज्यसभेचे खासदार धैर्यशीलदादा पाटील, राज्याचे मंत्री ना. नितेश राणे, आमदार महेंद्रशेठ दळवी, कामगार नेते ॲड. नितीन  शिवकर, के. एस. दस्तूर या सर्व नेत्यांचे कामगार संघटना फोरमने यावेळी आभार मानले. दरम्यान दि. २१ मे रोजी झालेल्या सभेमध्ये सर्व कर्मचारी यांचेकडून कामगार संघटना फोरमचे वरिष्ठ पदाधिकारी व मार्गदर्शक कामगार नेते यांचे मनःपूर्वक स्वागत करण्यात आले. पत्रकार परिषदेचे प्रास्ताविक चंद्रकांत अडसुळे यांनी केले.