अंगारकी चतुर्थी निमित्त वाघ्रण ते पाली साई गणेश पालखी सोहळ्याचे जोगेश्वरी नगर येथे उत्स्फूर्त स्वागत

नागोठणे : अंगारकी संकष्टी चतुर्थीच्या निमित्ताने अलिबाग तालुक्यातील वाघ्रण येथून सोमवारी(दि.११) सकाळी सहा वाजता अष्टविनायक क्षेत्र पाली येथे जाण्यासाठी पायी निघालेल्या साई गणेश पालखी सोहळ्याचे नागोठण्यातील जोगेश्वरी नगर (गावठाण) येथे सोमवारी रात्री आगमन झाले. त्यावेळी स्वराज्य मित्रमंडळ व जोगेश्वरी ग्रामस्थ मंडळाच्या वतीने पालखीचे उत्स्फूर्त स्वागत करण्यात आले. ग्रामस्थ मंडळाचे अविंद्र बामणे, रवींद्र बामणे, मंदार चितळे, केदार चितळे, अभिषेक वाळंज, श्रीकांत वाळंज, सचिन येरूनकर, अतुल बामणे, गजानन मोरवणकर, धनय बामणे, पार्थ वैशंपायन, नील खैरे, उर्मिला वैशंपायन, ऋतिका वैशंपायन, कविता बामणे आदींसह ग्रामस्थ व महिला यावेळी मोठ्या संख्येने उपस्थित होत्या.

या पालखीचे हे १३ वे वर्ष असून मंगळवार दिनांक १२ ऑगस्ट रोजी असलेल्या अंगारकी संकष्टी चतुर्थीच्या निमित्ताने वाघ्रण गावातील साई गणेश मंडळाच्या वतीने हा पायी सोहळा सोमवारी सकाळी सहा वाजता सुरू करण्यात आला. या पायी पालखी सोहळ्यात वाघ्रण गावातील शंभरहून अधिक पुरुष सहभागी झाले असून मंगळवारी सकाळी या पालखी सोहळ्यात वाघ्रण मधील इतर नागरिक व महिलाही सहभागी झाल्या होत्या.