निधनमहाराष्ट्र ग्रामीण
नागोठणे मोहल्ल्यातील अनवर शेख अंबा नदीच्या पात्रात गेला वाहून
वरवठणे बाजूकडून नागोठण्यात येत असताना पुलावरून पाय घसरला
नागोठणे मोहल्ल्यातील अनवर शेख अंबा नदीच्या पात्रात गेला वाहून
वरवठणे बाजूकडून नागोठण्यात येत असताना पुलावरून पाय घसरला
वाहून जाण्यापूर्वी वाचविण्याचे प्रयत्न निष्फळ
महेश पवार
नागोठणे : कामानिमित्त वरवठणे बाजूकडे गेलेला नागोठणे मोहल्ल्यातील ५७ वर्षीय अनवर शेख नागोठण्यातील जुन्या पुलावरून पाय घसरून पडल्याने अंबा नदीच्या पात्रात वाहून गेल्याची घटना शनिवारी(दि.२३) सकाळी अकरा वाजण्याच्या सुमारास घडली आहे. नदीच्या पात्रात अनवर शेख यांची शोध मोहीम सुरू असून संध्याकाळपर्यंत त्यांचा तपास लागलेला नाही.
व्यवसायाने चालक असलेले अनवर शेख हे साडेदहा वाजण्याच्या सुमारास वरवठणे बाजूकडून अंबा नदीवरील जुन्या पुलावरून नागोठण्यात येत असताना पुलाच्या मधोमध आल्यानंतर अनवर यांचा पाय घसरल्याने ते खाली पडले. मात्र त्यांना पुलाच्या पिलरचा आधार मिळाल्याने ते पिलरला पकडून थोडा वेळ उभे राहिले. त्यानंतर त्याठिकाणी उपस्थित असलेल्या नागरिकांकडून अनवर यांना पुलावर काढण्याचे प्रयत्न सुरू करण्यात आले.
अनवर यांना पुलाच्या वर घेण्यासाठी दोर टाकण्यात आले. मात्र दोरीला पकडून वर येत असतानाच अनवर यांच्या हातातून दोर सुटल्याने ते नदी पात्रात पडले. त्याचवेळी याठिकाणी उपस्थित असलेले पोलिस हे. कॉ. प्रकाश हंबीर यांनी नदीच्या पात्रात उडी घेऊन अनवर याला वाचविण्यासाठी केलेले शर्थीचे प्रयत्नही अपयशी ठरले. त्यानंतर एन व्ही आर एस एस टीम घटनास्थळी पोचल्यानंतर त्यांनी त्यांचे कार्य सुरू केले. थोड्या वेळाने अनवर शेख यांचा शोध घेण्यासाठी एस व्ही आर एस एस ची रेस्क्यू टीमही घटनास्थळी आली. त्यांच्याकडून अनवर यांचा अंबा नदीच्या पात्रात शोध सुरू आहे.
