नागोठणे टपाल कार्यालय असलेली इमारत धोकादायक अवस्थेत

नागोठणे : नागोठणे टपाल कार्यालय ज्या इमारतीतून गेली अनेक वर्षे आपला कारभार चालवीत आली आहे ती जुनी इमारत सध्या धोकादायक अवस्थेत आहे. ही इमारत वापरण्यायोग्य नसल्याचा स्ट्रक्चरल ऑडीट अहवाल अलिबाग येथील असोसिएटेड कन्सल्टिंग इंजिनिअर्स यांच्याकडून या इमारतीची प्रत्यक्ष पाहणी करून १३ मार्च, २०२३ मध्येच देण्यात आल्याने या इमारतीमधील टपाल कार्यालयात विविध कामांसाठी  येणाऱ्या नागरिकांच्या व खातेधारकांच्या जीवाला धोका निर्माण झाला आहे. त्यामुळे या इमारतीत सुरू असलेले टपाल कार्यालय तत्काळ इतरत्र हलवावे असा पत्रव्यवहार स्ट्रक्चरल ऑडीट अहवाल प्राप्त झाल्यानंतर टपाल कार्यालय व संबंधितांकडे केला असल्याचे नागोठणे ग्रामपंचायतीच्या सरपंच सुप्रियाताई महाडिक यांनी सांगितले.

नागोठणे टपाल कार्यालय असलेली इमारत अत्यंत जुनी असून ती पावसाळ्यात, वादळवाऱ्यात किंवा अतिवृष्टीमुळे केव्हाही पडेल आणि मनुष्यहानी होईल अशी शक्यता असल्याने या इमारतीचे  स्ट्रक्चरल ऑडीट करून त्याचा अहवाल सदर करावा असे नागोठणे ग्रामपंचायत कार्यालयातून या धोकादायक इमारतीचे मालमत्ता पत्रकावर असलेले सर्व मालक तसेच नागोठणे टपाल कार्यालयाचे पोस्ट मास्तर यांच्याकडे सन २०२१ पासून वेळोवेळी पत्रव्यवहार करण्यात आला होता. त्यानुसारच या धोकादायक इमारतीची साधारण अडीच वर्षांपूर्वी अलिबाग येथील असोसिएटेड कन्सल्टिंग इंजिनिअर्स यांच्याकडून संबधित इमारतीच्या जागी प्रत्यक्ष भेट देवून प्रत्यक्ष पाहणी केल्यानंतर ही इमारत वापरण्यायोग्य नसल्याचा अहवाल १३ मार्च, २०२३ रोजी देण्यात आलेला आहे. असे असूनही पोस्ट कार्यालयाचे अधिकारी नवीन जागा शोधण्यासाठी टाळाटाळ करीत असल्याने नागरिकांतून तीव्र संताप व्यक्त करण्यात येत असून याबाबत टपाल खात्यातील  कुणाचे आर्थिक साटेलोटे तर आड येत  नाहीत ना अशी उलटसुलट चर्चा होत आहे.