नागोठणे पोलिस ठाण्यातील बाप्पांना भावपूर्ण निरोप 

गणेशोत्सव काळात बंदोबस्तामुळे पोलिस कर्मचाऱ्यांना रजा मिळत नसल्याने त्यांना आपल्या गावी जाता येत नाही. त्यामुळेच रायगड जिल्ह्यातील बहुतांश पोलिस ठाण्यात गणेशोत्सव साजरा करण्यात येत असतो. त्यामुळेच गणेशोत्सव काळातील आपले कर्तव्य  बजावुन गणपती बाप्पांची सेवा ड्युटीवर असतानाच करण्याची संधी पोलिस कर्मचाऱ्यांना मिळत असते. त्यानुसारच नागोठणे पोलिस ठाण्यालगत असलेल्या श्री दत्त मंदिरात दरवर्षी प्रमाणे यावर्षीही गणपती बाप्पांची प्रतिष्ठापना करण्यात आली होती. अनंत चतुर्दशीच्या बाप्पांचे मंगळवारी विसर्जन करण्यात आल्यामुळे गणेशोत्सव बंदोबस्तातून मोकळे झालेल्या नागोठण्यातील पोलिस ठाण्यातील कर्मचाऱ्यांनी बुधवारी  सायंकाळी सात  वाजण्याच्या सुमारास आपल्या बाप्पांची वाजत गाजत मिरवणूक काढली. पोलिस ठाण्यात नेहमी वर्दीत दिसणाऱ्या मात्र विसर्जन मिरवणुकीसाठी खास वेशभूषा केलेल्या महिला पोलिस कर्मचारी,  गणेश विसर्जनासाठी खास तयार केलेले टी शर्ट परिधान केलेल्या पोलिस कर्मचाऱ्यांनी व त्यांच्या कुटुंबियांनी पारंपारिक बेंजोच्या तालावर ठेका धरत विसर्जन मिरवणुकीत मनसोक्तपणे नाचण्याचा आनंद लुटला.