नागोठणे परिसरातील लाडक्या बाप्पांना व माहेरवाशीण गौरींना भक्तिमय वातावरणात निरोप 

नागोठणे : “ गणपती बाप्पा मोरया, पुढल्या वर्षी लवकर या “, “ गणपती गेले गावाला, चैन पडेना आम्हाला “ असा जयघोष करीत नागोठणे पोलीस ठाणे हद्दीतील नागोठणे शहर व परिसरांतील पाच दिवसांच्या सुमारे १०८० खासगी व रिलायन्स टाऊनशीप, कातळावाडी व पिंपळवाडी येथील ३ सार्वजनिक गणपती बाप्पांना तसेच माहेरवासीन असलेल्या १७५ गौरींना मंगळवारी (दि.०२) अतिशय भक्तिमय वातावरणात मनोभावे भावपूर्ण निरोप देण्यात आला. दरवर्षीप्रमाणे यंदाही नागोठणेसह संपूर्ण विभागात गौरी गणपती सण पारंपारिक पद्धतीने अतिशय भक्तिमय आणि तितक्याच उत्साहवर्धक वातावरणात साजरा करण्यात आला. यावेळी दुपारनंतर सुरू झालेला गौरी गणपती बाप्पांचा विसर्जन सोहळ्यात यावेळी पावसाने विश्रांती घेतल्यामुळे नागोठणे शहर व परिसरातील ग्रामीण भागातील गणेश भक्तांनी अधिकाधिक जल्लोष आणि आनंद लुटला.  नागोठणे शहर व परिसरातील सर्व विसर्जन स्थळी कोणताही अनुचित प्रकार घडू नये तसेच उत्साहाच्या, आनंदाच्या क्षणी कोणताही गालबोट लागू नये, कोणतीही अनुचित घटना घडू नये यासाठी नागोठणे पोलीस ठाण्याचे सहाय्यक पोलिस निरिक्षक सचिन कुलकर्णी यांच्या मार्गदर्शनाखाली यावेळी नागोठणे शहर व परिसरात सर्वत्र चोख पोलिस बंदोबस्त ठेवण्यात आला होता.