सर्वसामान्यांना उभे करणे हेच श्री जोगेश्वरी पतसंस्थेचे ध्येय : किशोरभाई जैन

सर्वसामान्यांना उभे करणे हेच श्री जोगेश्वरी पतसंस्थेचे ध्येय : किशोरभाई जैन

सभासदांना १० टक्के लाभांश जाहीर 

महेश पवार 

नागोठणे :  श्री जोगेश्वरी मर्चंट सहकारी पतसंस्थेच्या वाटेत अनेक ससे आले, धावले, दमले आणि थांबले मात्र आमच्या पतसंस्थेने कुणाशीही स्पर्धा न करता कासवाच्या चालीने चाल केल्यानेच यश मिळविले. संस्थेचे संचालक, सभासद, ठेवीदार यांच्या विश्वासामुळे हे शक्य झाले आहे. व्यसनाच्या आहारी जाऊन आत्महत्येचा विचार डोक्यात आलेल्या एका कारागिर व्यक्तीला कर्ज देऊन सावरण्याचे काम आम्ही केले. ग्रामदेवतेच्या नावाने ही पतसंस्था असल्याने संस्थेत कोणतेही वाद नाही, निवडणूक बिनविरोध होते तसेच राजकारणातही आम्हाला यश मिळत आहे. पतसंस्थेच्या संचालकांनी कधीच चुकीच्या लोकांना कर्ज देण्यासाठी शिफारस केली नाही. हातावर कमविणाऱ्या लोकांना ५० लाख कर्ज देणाऱ्या बँकांची गरज नसते. त्यांना २५–५० हजार तातडीचे कर्ज देणाऱ्या पतसंस्थेची गरज आम्ही पूर्ण केली. त्यामुळेच सर्वसामान्यांना उभे करणे हेच श्री जोगेश्वरी पतसंस्थेचे ध्येय असल्याचे प्रतिपादन संस्थेचे अध्यक्ष किशोरशेठ जैन यांनी केले व सभासदांना यावेळी १० टक्के लाभांशही जाहीर केला.

नागोठण्यातील नावाजलेल्या श्री जोगेश्वरी मर्चंट सहकारी पतसंस्थेची २६ वी वार्षिक सर्वसाधारण सभा येथील शिवगणेश सभागृहात रविवारी (दि. ७) सायंकाळी उत्साहात संपन्न झाली त्यावेळी किशोरशेठ जैन बोलत होते. यावेळी किशोरशेठ जैन यांच्यासह उपाध्यक्ष प्रकाश (घिसूशेठ) जैन, नागोठण्याच्या सरपंच सुप्रियाताई महाडिक, शिवसेना नागोठणे विभाग प्रमुख संजय भोसले, दैनिक  सामनाचे उपसंपादक राजेश पोवळे, पतसंस्थेचे सचिव संजय काकडे, संचालक डॉ. मिलिंद धात्रक, रितेश दोशी, राजकुमार जैन, मोहन नागोठणेकर, विजया परमार, कल्पना टेमकर, दीपिका गायकवाड, नागोठणे ग्रामपंचायतीच्या सदस्या शबाना मुल्ला, व्यवस्थापक सुनील नावले आदींसह अनेक मान्यवर व सभासद यावेळी बहुसंख्येने उपस्थित होते.