तरुणाच्या खून प्रकरणातील आरोपींना १९ ऑक्टोबर पर्यंत पोलिस कोठडी 

नागोठणे : नागोठणे पोलिस ठाण्याच्या हद्दीतील वासगावकडे जाणाऱ्या रस्त्यालगत झाडीत झालेल्या पेण तालुक्यातील पाबळ खोऱ्यातील  गौळावाडी येथील तरुणाच्या खून प्रकरणातील तिन्ही आरोपींना रोहा येथील फौजदारी न्यायालयात शुक्रवार दिनांक १६ ऑक्टोबर रोजी दुपारी हजर करण्यात आले होते. या तिन्ही आरोपींना न्यायालयाने १९ ऑक्टोबर पर्यंत पोलिस कोठडी सुनावली आहे.

मृत तरुण कृष्णा नामदेव खंडवी (वय २३) रा. गौळावाडी, पो. पाबळ, ता. पेण या  तरुणाचा १० ऑक्टोबर रोजी खून झाला होता. त्यानंतर नागोठणे पोलिसांनी कसून तपास करत या खून प्रकरणातील मास्टर माईंड असलेली मृत तरुणाची पत्नी दीपाली अशोक निरगुडे (वय १९), रा. मोहाची वाडी, पो. पाबळ, ता. पेण, तिचा प्रियकर उमेश सदू महाकाळ (वय २१) रा. बारीमाळ, ता. त्र्यंबकेश्वर, जि. नाशिक व त्याची मैत्रीण सुप्रिया प्रकाश चौधरी (वय १९) रा. आडगाव देवळा, ता. त्र्यंबकेश्वर, जि. नाशिक या तिघांना बेड्या ठोकल्या होत्या.  जिल्ह्याच्या पोलिस अधीक्षक आँचल दलाल, अप्पर पोलीस अधीक्षक अभिजित शिवथरे, रोहाचे पोलिस उपअधीक्षक प्रसाद गोकुळे यांच्या मार्गदर्शनाखाली नागोठणे पोलिसांनी ही सर्वोत्तम कामगिरी केली होती.