जिल्ह्यात कुठेही नसेल असे प्रशिक्षण केंद्र नागोठण्यात महिलांसाठी उभारणार 

नागोठणे : प्रत्येक घरातील आई व लेकीप्रमाणेच प्रत्येक घटकातील महिला सक्षम झाली पाहिजे ही आमची भूमिका आहे. त्यामुळेच लाडकी बहीण योजना राबविताना कोणतेही जातीभेद न मानता सर्व महिलांना याचा लाभ दिला.  महायुतीच्या मंत्रिमंडळात एकमेव महिला मंत्री असताना मला ही ही महत्वकांक्षी योजना राबविण्याची संधी मिळाली. त्यामुळे महायुती सरकार असेपर्यंत लाडकी बहीण योजना सुरू राहणार असून विरोधकांच्या खोट्या  प्रचाराला आणि भूलथापांना बळी पडू नका. सर्व जाती-धर्माच्या घटकातील महिलांना एकत्र घेऊन काम करणे ही आमची भूमिका आहे. आज हळदी कुंकू किंवा होम मिनिस्टर सारखा खेळ नसतानाही महिलांची दुप्पट गर्दी झाली ही विजयाची नांदी आहे. जिल्हा परिषदेचे नागोठणे गटाचे उमेदवार किशोरभाई जैन यांना जिल्हा परिषदेतील कामाचा अनुभव आहे. पंचायत समितीच्या उमेदवार समृद्धीताई कोळी यादेखील महिलांचे नेतृत्व करू शकणाऱ्या उमेदवार आहेत. हे कॉम्बिनेशन जुळले तर जिल्ह्यात कुठे झाला नसेल एवढा नागोठणे विभागाचा विकास होणार असून जिल्ह्यात कुठेही नसेल असे प्रशिक्षण केंद्र नागोठण्यात महिलांसाठी उभारणार असल्याची ग्वाही राज्याच्या महिला व बालविकास मंत्री आदितीताई तटकरे यांनी महिलांचा उत्स्फूर्त प्रतिसाद मिळालेल्या  नागोठण्यातील महिला मेळाव्यात व प्रचार सभेत दिली.