नागोठणे लायन्स क्लबच्या शिबिरात ७२ रुग्णांची डोळे  तपासणी

नागोठणे : नागोठणे लायन्स क्लबचे माजी  अध्यक्ष पांडुरंग उर्फ पी. के. शिंदे यांनी आपले वडील ह. भ. प. वै. कृष्णा पां. शिंदे व आई ह. भ. प. वै. द्रौपदी कृष्णा शिंदे

यांच्या स्मरणार्थ आर झुनझुनवाला शंकरा आय हॉस्पीटल,  नवीन पनवेल यांच्या सहकार्याने नागोठणे लायन्स क्लबने येथील शांतीनगर भागातील स्व. बाळासाहेब ठाकरे बाल उद्यानात बुधवारी(दि.७) आयोजित केलेल्या  नेत्रचिकित्सा शिबिरात ७२ नागरिकांनी त्यांच्या डोळ्यांची तपासणी केल्याने या शिबिरास उत्स्फूर्त प्रतिसाद मिळाला.  यामध्ये मोतिबिंदू आढळलेल्या २१ रुग्णांना शस्त्रक्रियेसाठी शंकरा आय हॉस्पीटल येथे पाठविण्यात आले.

यावेळी यशवंत चित्रे यांनी आपल्या मनोगतात लायन पांडुरंग शिंदे यांच्या सामाजिक कार्याची माहिती दिली आणि त्यांनी आपल्या आई वडिलांच्या स्मरणार्थ नेत्रचिकित्सा शिबिर आयोजित करण्याचे मोलाचे सामाजिक कार्य केल्याचे सांगितले.  यावेळी लायन डॉ.अनिल गीते यांनी मोतीबिंदू शास्त्रक्रिये नंतरची डोळ्यांची निगा व काळजी याविषयी अतिशय महत्वपूर्ण माहिती उपस्थित नागरिकांना दिली. या शिबिराच्या निमित्ताने स्व. बाळासाहेब ठाकरे बाल उद्यानातील नव्याने तयार करण्यात आलेल्या सिमेंट पत्र्याच्या शेडचा मजुरीचा खर्च लायन्स क्लबचे अध्यक्ष सखाराम ताडकर यांनी स्वतः केल्याने ला. विलास चौलकर यांच्या हस्ते त्यांचा सत्कार करण्यात आला. या कार्यक्रमाचे सूत्रसंचालन व आभारप्रदर्शन एमजेएफ लायन विवेक सुभेकर यांनी केले.  हे नेत्रचिकित्सा शिबिर यशस्वी होण्यासाठी आर झुनझुनवाला शंकरा आय हॉस्पीटलच्या समुपदेशक ज्योती पाटील, नेत्रचिकित्सक स्वप्ना राणे, अर्पिता जाधव, आशा सेविका निधी जांबेकर यांनी सहकार्य केले.