नागोठणे परिसरात अवकाळी पावसामुळे वीटभट्ट्यांचे मोठे नुकसान 

शासनाने नुकसानभरपाई जाहीर करावी – निखिल मढवी 

वीटभट्टीमध्ये काम करण्यासाठी इतर ठिकाणाहून कामगार आणले जातात. परंतु अवकाळी पावसाने नुकसान झाले तरी या कामगारांना पगार आणि रोजची हजेरी द्यावीच लागत असल्याचे खंत वीटभट्टी मालकांनी व्यक्त केली आहे. तसेच रॉयलटी भरुन सुध्दा शासनाकडून कोणत्याही प्रकारची नुकसान भरपाई मिळत नाही. दरवर्षी अवकाळी पावसामुळे वीट भट्टी व्यवसायिकांना नुकसानीला सामोरे जावे लागते परंतु शासनाकडून कोणतीही मदत होत नाही. अवकाळी पावसामुळे नुकसान झालेल्या वीटभट्टीचे  पंचनामे करून नुकसानभरपाई दिली जाते. त्याचप्रमाणे आमच्या वीटभट्टीचे पंचनामे करून सरकारने आम्हाला देखील नुकसानभरपाई द्यावी अशी मागणी नागोठणे विभाग चालक मालक वीटभट्टी संघटना नागोठणेचे अध्यक्ष निखील बाळाराम मढवी यांनी केली आहे. याप्रकरणी खासदार धैर्यशीलदादा पाटील यांच्याकडे दाद मागणार असल्याचेही निखिल मढवी यांनी सांगितले.