नागोठणेकरांची सोमवारची रात्र गेली काळोखात 

नागोठणेकरांची सोमवारची रात्र गेली काळोखात 

शांत व संयमी असलेल्या नागोठणेकरांचे हाल काही संपता संपत नसल्याचे दिसून येत आहे. विजेच्या बाबतीत नागोठणेकरांना कुणी वाली आहे की, नाही असा प्रश्नही आता उपस्थित होत आहे. त्यामुळे स्थानिक आमदार रविशेठ पाटील यांनी पेण प्रांत कार्यालयात सोमवारी(दि.२१) विजेच्या अनेक समस्यांवर जसा जनता दरबार घेतला त्याप्रमाणेच वीज वितरणाच्या पेण, पाली व रोहा येथील वरिष्ठ अधिकाऱ्यांना बोलवून नागोठण्यातील विजेच्या समस्यांसाठी नागोठण्यात जनता दरबार घेऊन  विजेच्या समस्यांवर ठोस उपाययोजना करण्याची मागणी नागरिकांतून होत आहे. 

गणपतीपूर्वी वीजपुरवठा सुरळीत करण्यासाठी प्रयत्नशील 

गेले काही दिवस सुरु असलेल्या मुसळधार पावसामुळे चितळकर जिमच्या मागील बाजूस असलेल्या विजेच्या खांबाच्या ठिकाणी पाणी भरले होते. हाच खांब सोमवारी रात्री कलंडला.  त्यामुळे नागरिकांना रात्रभर अंधारात राहावे लागले. मात्र आमच्या कर्मचारी वर्गाने पाऊस असूनही जीर्ण झालेला विजेचा खांब उभा करण्याबरोबरच उच्च दाब विजेच्या ताराही बदलल्या. शट डाऊन मधील काम वाढल्याने ती कामे करण्यासाठी अधिक वेळ घ्यावा लागला.  मी नव्यानेच नागोठण्याचा पदभार स्वीकारला असल्याने येत्या काही दिवसांत वीजपुरवठा खंडित होणार नाही यासाठी खबरदारी घेऊन नागोठणे शहर व विभागातील विजेच्या सर्व बाबतीत दुरुस्ती करून गणपतीपूर्वी विद्युत पुरवठा कसा सुरळीत होईल यासाठी मी स्वतः प्रयत्नशील आहे.

सत्येंद्र सिंग, 

सहाय्यक अभियंता,

विजवितरण –नागोठणे