नागोठण्यात बिबट्या आला रे आला ?

नागोठणे : सध्या सोशल मीडिया आणि सर्वत्रच बिबट्या आढळून आल्याच्या वृत्ताने खळबळ निर्माण झाली आहे. असे असतांनाच नागोठणे आय टी आय च्या मागील बाजूस असलेल्या झाडी झुडपांत असलेल्या जागेत बिबट्याच्या च्या संशयास्पद पाऊलखुणा आढळून आल्याचे आय टी आय च्या सुरक्षा रक्षकाने संशय व्यक्त केल्याने आणि संबंधित विभागाला पाठविण्यासाठी तयार केलेले तशा आशयाचे पत्र नागोठणे आय टी आय कडून संबंधित विभागाला पाठविल्याने आणि ते पत्र नागोठण्यातील व्हॉट्स ॲप ग्रूपवर व्हायरल झाल्याने खळबळ निर्माण झाली. मात्र हे ठसे फॉरेन्सिक टीमला कुत्र्याच्या पायाचे आढळून आल्याने नागोठणे शहर व परिसरात सर्वांनी सुटकेचा श्वास घेतला घेतला आहे. मात्र असे असतांनाच सध्या बिबट्याच्या नावाने सर्वत्र बोंब असल्याने कुणीही खात्री केल्याशिवाय सोशल मीडियावर अफवा पसरवू नये अन्यथा संबंधिताविरोधात गुन्हा दाखल करण्यात येईल असे संकेत वन खात्याचे नागोठणे वन परिक्षेत्र अधिकारी दादासाहेब कुकडे यांनी दिले आहेत.

यासंदर्भात उपलब्ध झालेल्या माहितीनुसार या संदर्भात नागोठणे औद्योगिक प्रशिक्षण संस्थेकडून रोहा प्रांत अधिकारी, रोहा तहसीलदार, सरपंच नागोठणे ग्रामपंचायत तसेच जिल्हा वनाधिकारी व स्थानिक कार्यालय यांना २९ डिसेंबर रोजी एक पत्र पाठवून नागोठणे आय टी आय परिसरात बिबट्या आढळल्याची लेखी माहिती कळविली आहे.  नागोठणे आय टी आय कडून पाठविण्यात आलेल्या या पत्रात म्हटले आहे की, शासकीय औद्योगिक प्रशिक्षण संस्था नागोठणे या संस्थेच्या परिसरामध्ये व अवतीभवती बिबट्याच्या पायाचे ठसे आढळून आले असून व प्रत्यक्ष तीन ते चार दिवसांपासून बिबट्या परिसरात वावरताना दिसून आलेला आहे. सदर संस्थेमध्ये एकूण ४०० ते ४५० प्रशिक्षणार्थी विविध व्यवसायामध्ये प्रशिक्षण घेत आहेत. सदर परिसरामध्ये बिबट्या वाघाचे दर्शन व पायाचे ठसे दिसून आल्यामुळे या संस्थेतील कर्मचारी व प्रशिक्षणार्थ्यांमध्ये भीतीचे वातावरण तयार झाल्यामुळे त्याचा परिणाम प्रशिक्षणार्थ्यांवर झाल्याचे दिसून येत आहे. तरी संस्थेच्या परिसरामध्ये बिबट्याचा बंदोबस्त करण्यासाठी आपल्या स्तरावर त्वरित उपाययोजना करण्यात यावी अशी विनंती या पत्राद्वारे संबंधितांना  करण्यात आली आहे.

दरम्यान नागोठणे औद्योगिक प्रशिक्षण संस्थेच्या मागील बाजूस असलेल्या झाडी झुडपांतील परिसरात आढळलेल्या प्राण्याच्या पायाचे ठसे पुणे येथील फॉरेन्सिक लॅब मध्ये पाठवले असता तसेच रोहा येथील फॉरेन्सिक टीमने पायाचे ठसे प्रत्यक्ष जागेवर येऊन तपासले असता हे पायाचे ठसे कुत्र्याचे असल्याचा निष्कर्ष पुणे फॉरेन्सिक लॅब व रोहा येथील फॉरेन्सिक टीमने काढला असल्याची अधिकृत माहिती नागोठणे वनपरिक्षेत्र अधिकारी दादासाहेब कुकडे यांनी दिली आहे.